Muslima.Uz

Эркаклар орзусидаги аёл қандай бўлиши керак? Аёллар орзсусидаги эркакчи?

Подробности

Бўлим: Долзарб мавзу

Инсон ёлғизликда бахт топмайди. Унинг саодат ва ҳаловати ён-атрофидагилари билан боғлиқ.  Қолаверса, бахтли турмуш, омадли никоҳ, сени ҳар томонлама тушунадиган, ардоқлайдиган ва орзуларингга мос келадиган жуфтинг ҳам тақдирнинг бебаҳо туҳфаси. Ҳар кимнинг ўз тасаввуридаги идеал инсони бўлади. Кимдир ўша идеалига дуч келиб, тақдир йўлларини  у билан боғлашга муваффақ бўлади. Кимдир тақдирига битилган жуфтидан ўз идеалини ясаб олади. Кимдир орзу қилган инсонини ҳаётда учратолмай армон билан ўкиниб яшайди. Умуман олганда, инсонлар қандай жуфтни орзу қилишади? Эркаклар учун идеал аёл қандай бўлиши керак? Аёлларимизнинг тассаввуридаги шаҳзода қандай экан?  Бугунги репортаж айни мавзуда.

Меҳр-муҳаббат ҳар нарсадан қадрли

Улуғбек Жўраев, 36 ёш: — Билишимча эркак ва аёл ўз жуфтини бир хил орзу қилади. Гўзал, қомати келишган, меҳрибон, тақдирига битилган ёри ва унинг оила аъзоларини астойдил  ҳурмат қиладиган, бир иш бошлашдан олдин эри ё аёлининг маслаҳатига қулоқ соладиган жуфт ҳамма учун идеал ҳисобланади. Менимча аёлга меҳр -муҳаббат, ширин сўз, эътибор шарт. Бу улар учун қиммат баҳо буюмдан кўра қадрлироқ ва зарурроқдир.

Тушган жойига сингиб кетса...

Нодирбек ЭРГАШАЛИЕВ, 28 ёш:  — Мен иболи, ораста, покиза қизни идеал қиз деб биламан. Иболи бу ўзини номаҳрамлардан яшира оладиган, ўзини ҳурмат қила била оладиган кўпчиликни орасида ўзини тута била оладиган аёлга берилган нисбат деб ўйлайман.  Покизалиги ўзига ҳам, эрию оиласига ҳам гард юқтирмайдиган, хонадони шаънини ҳар недан устун қўядиган аёлларни қадрлайман. Қолаверса, уйнинг гапини кўчага чиқариб элга овоза қилмайдиган, уйим-жойим деб тушган жойига сингиб кетадиган қизлар ҳам йигитларнинг орзусидаги малика.

Аёл ғайратсиз эркакни севмайди!

Ҳафиза Азимова, 29 ёш: — Ҳамманинг ҳам ўз идеали бўлади. Иделлар ҳар хил бўлади, бу инсоннинг  ёши, қизиқишлари, дунёқараши, тарбиясидан келиб чиқади. Мисол учун бўйдоқ йигитларнинг кўпчилиги аёл кишининг ташқи суръатига қараб баҳолайди. Бўйдоқнинг кўзи билан қиз танлама деган ибора ҳам бежизга ишлатилмайди, халқ орасида. Исломдан хабардор йигитлар қизнинг диний таълимотини юксак баҳоласа, баъзи йигитлар қиз отасининг обрў-эътибори, иқтисодий аҳволига қизиқади. Менталитетнинг ҳам ўрни бор бу борада. Баъзи йигитлар ўқимишли, олий маълумотли қизни орзу қилсалар, баъзиларига қизнинг савиясининг аҳамияти йўқ: улар учун аёл киши ювошгина, қўпол қилиб айтсам, бола туғиб, боқиб ўтирса бўлди.

Аёл киши эса ҳар жиҳатдан  ўзидан бир поғона юқори эркакни орзу қиладилар: бўй-баст, қад-қомат, савия, молиявий аҳвол, ирода ва ҳоказо. Идеал эркак киши уй бошлиғи, суянишга арзигулик тоғ, ўз сиёсатига эга бўлиши керак. Мисол учун эркак киши турмуш муаммоларига ечим топа олмайдиган, беғам, бўшанг бўлса аёл киши олдида обрўйини йўқотади. Аёллар эркак кишининг кам пул топишига сабр қилишлари мумкин, лекин ғайратсиз эркакни севмайдилар.

Асл бахт- тақводор жуфт билан

Ҳайдар Абдулла, 47 ёш: — Бу жуда ҳам катта мавзу. Инсонлар  яратилиш моҳиятига кўра турлича. Шунинг учун бу борадаги тушунчалар ҳам турлича бўлиши табиий ҳол. Яратганнинг махлукотларида  маъно  жиҳатида уч юзи бор. Бир юзи бу дунёга қарайди, қайсики биз кўзимиз билан кўриб ҳис қилаётган зарар ва манфаатлар. Иккинчи юзи охиратга қарайди, қайсики инсон бу ерда қилган амаллари натижасини охиратда кўради. Учинчи юзи Аллоҳнинг исмларининг  бу дунёдаги жилвалари...  Мана энди саволга кўчамиз. Лекин саволни бироз ўзгартирсам, дегандим.  Яъни  "ҳақиқий эркак орзусидаги аёл қандай бўлиши керак?" десам, балки эркакларимиз ҳам аёлларимиз бу маслага жиддий қараган бўлар эдилар.  Бу масалада жуда гап кўп, имкон қадар қисқа қиламан, мени диққат билан ўқиганлар ҳақиқатни топади иншаАллоҳ. Маълумки энг буюк лаззат  дунё ва охиратда бахтли - саодатли бўлиш. Бу дунёда "бахтли эр-хотин" бўлиб  яшашлик орзусини ҳар ким ҳис қила олади. Энди дунё ҳам охират жиҳатида мақбул бахтли оила кимлар?  Шу ерда эркак ҳам хотин учун энг муҳим жавоб бор. Бу жавобни мен етишган буюк "Ҳакикат соҳиблари"нинг сўзларидан кўчириб айтяпман: “Бахтиёрдир у эркакки; аёлини диндор кўриб, рафиқасини абадий ҳаётда йўқотмаслик у ҳам диндор бўлади (динда яшайди). Бахтиёрдир у хотинки; эрининг диёнатига боқиб "абадий ҳаётдошимни ҳеч кимга бермайман" деб  у ҳам тақвога киради.  Дўзахи вайл бўлсин у эркаккаки; солиҳа хотинини абадий йўқотадиган айш- ишратга берилади. Қандай бадбахт хотинки; такводор хўжайинига тақлид этмас, у муборак абадий рафиқасини қўлидан бой бермоқда.  Минглар дўзахи вайл бўлсин у икки бахтсиз эр-хотингаки  бир-бирининг фисқ ва сафоҳатига тақлид этадилар. Бир -бирини оловга отилишига ёрдам бермоқдалар...

Инсоннинг фитрати тоза бўлсин...

Сожида Алимова, 33 ёш: — Аёлларнинг орзусидаги эркак ҳақида бир сўз билан, мард, гапида  турадиган, ваъдасига вафоли,  рўзғорини таъминлаб қўядиган инсон деб аташ тўғри. Лекин ҳурматли эркакларимиз, уйланиш остонасидаги  йигитлар бундоқ сал орқа олдларига қарб орзу қилсалар яхши бўлармиди?! Аёл кишига кўп нарса боғлиқ-да. Аввломбор йигитларимиз насл-насаби тоза, қони тоза, онаси покиза, фаҳш-ва зинодан йироқ қизларни орзу қилсалар ҳам ўзларига ва ҳам жамиятга наф бўларди.  Шу ўринда ўз кўзим билан кўрган бир воқеани келтириб ўтишликни жоиз билдим.

Бир ой олдин ишхонамга яқин “дом”га кўчиб ўтдик. Сирдарёлик бир аёл бор экан. Кўринишидан бир чиройли аёл. Икки фарзанди билан эрларига хиёнат қилган эканлар.  Ажрашишган. Болалар эрида қолган.  Аёл етти йилдан бери Тошкентда. Хоним кўнгиллари нимани хоҳласа шуни қилар эканлар.  Уйга фақат кийим алмаштиришга келади. Собиқ эри ҳозир уйланган,  яна фарзандли бўлиб бахтли яшашяпти экан. Рамазон кунларида у аёлни қилган ишларини эшитиб, кўриб ҳайратдан қотиб қолдим. Ҳозир Москвада эканлар. Эркакку ҳаётини йўлга солгандир, лекин биринчи хотини хиёнат қилган, деган маломат, фарзандалри учун “онаси хиёнаткор, ахлоқи бузуқ” деган таънани эшитиш қанчалик оғир?! Бу маломатларининг залвори осони эмас!.. Шу сабаб ҳам бошида айтганимдек, йигитлар ниятда ҳам эҳтиёт бўлишлари шарт.

Аёлга меҳр беринг...

Гулноз Алишер қизи, 31 ёш:— Саволингизга жавобни севимли шоирамиз Ҳалима Худойбердиеванинг қуйидаги сатрлари билан бошласам:

Йиғласангиз йиғланг ҳушёр, сергак учун,
Не бир яхши, ёмон кунда тиргак учун.
Опам, синглим, кўз ёш тўкманг сира-сира,
Аёлга бахт беролмаган эркак учун...

Аёл қандай эркакни орзу қиларди? Ўзига бахт бера оладиган, яхши ёмон кунида тиргак бўладиган, йиғлагиси келганида елкасини тутадиган, бош қўйгиси келганда кўксини берадиган, мард, фидоий эркак учун аёл жонини, борини, ҳаётини бахш этади. Унинг орзуси шугина, фақат шугина. Халқ ёзувчиси Ўткир Ҳошимов шундай дейдилар: “Ой Қуёшдан нур олади. Аёл ҳусни муҳаббатдан очилади. Эркак қанча кўп меҳр берса, аёлнинг ҳусни шу қадар очилади”... Демак, аёлни ҳақиқий аёлга айлантирадиган бу жуфтининг унга бўлган меҳр-муҳаббати...

Турмуш қуриш- бу бамисоли лоторея, аммо унда ютуқсиз чиптани йиртиб ташлаш имконияти йўқ,  деган эди файласуфлардан бири.  Демак,  яхши жуфт билан тақдир йўлларининг бирлашуви ҳам Аллоҳнинг бир карами, туҳфаси экан. Инсоннинг жуфти ҳалоли –имтиҳонидир. Нима ҳам дердик, ният юксак, кўнгил тоза бўлсин аввало.  Орзусидаги инсон билан бахтли умргузаронлик қилиш саодати ҳаммага насиб этсин.

Умида АЗИЗ тайёрлади