Эрли аёлнинг оиласини бузиш мумкинми?

• 

Подробности

Бўлим: Фатволар

Чиққан санаси: 21 Июнь 2014

(Нашр қилинган санаси)

Бир йигит ёш жувонни ёқтириб қолди. Йигит уни ҳозирги оиласидан ажратиб олиб, уйланмоқчи. Унинг тутаётган бу йўли тўғрими?

ЖАВОБ: Бировнинг тинч оиласини бузиш катта гуноҳ. Эри бор аёлга уйланишни ҳеч ким ҳатто хаёлига ҳам келтирмаслиги керак. Бу иш шариатда мутлақо мумкин эмас.
Абу Ҳурайра розияллоҳу анҳудан ривоят қилинади: «Пайғамбар соллаллоҳу алайҳи васаллам: «Ким бир аёлнинг эри билан ёки қулнинг хожаси билан орасини бузса, биздан эмас», дедилар» (Абу Довуд ва Насаий).
Аёл киши ишонувчан, меҳрга, ширин сўзга ташна бўлади. Унга эри ҳақида бўлмағур гапларни айтиб-уриштириб, оиласини бузишга сабаб бўладиган кимса мусулмон ҳисобланмайди. “Муфҳумул мухолафа” қоидасига биноан, эрга хотин ҳақида турли бўлмағур гапларни айтиб, уни хотинга қарши қайрайдиган кишилар ҳам мусулмонга хос бўлмаган ишни қилган бўлади. Аксинча, мусулмон инсон нима қилиб бўлса ҳам эру хотиннинг орасини яхшилашга, уларни муросага келтиришга ҳаракат қилиши лозим. Ҳатто бу маънода шариатимиз ёлғон гапиришга ҳам изн берган.
Абу Ҳурайра розияллоҳу анҳудан ривоят қилинади: «Пайғамбар соллаллоҳу алайҳи васаллам: «Ҳеч бир аёл ўз синглисининг товоғини бўш қолдириб, ўзи никоҳланиб олиш учун унинг талоғини сўрамасин. Албатта, унга ҳам тақдир қилингани бўлур», дедилар» (Бухорий, Муслим, Абу Довуд, Термизий).
 Аёл кишилар ҳам, ким бўлишидан қатъи назар, бой-бадавлат, мансабли, обрўли эркакни ўзиники қилиб олиш учун аввалги хотинини талоқ қилдиришга асло уринмаслиги лозим. Ризқу рўз, оилавий бахт масалалари тақдирга қараб бўлади. Бировнинг оиласини бузишга урингандан кўра, уларга бахт-саодат тилаб, ўзига ҳам худди ўшандай, балки ундан ҳам яхшироқ оила бўлишини тилаш ва бунга ҳалол-пок йўл билан ҳаракат қилиш керак.
Афсуски, баъзи аёллар бу ҳақиқатни тушуниб етишмайди, тўғрироғи, тушуниб етишга уринишмайди ҳам. Улар учун тайёр оилага осон йўл билан кириб олиш бахт-саодат манбаи бўлиб кўринади. Ҳадиси шарифга яхшилаб эътибор берадиган бўлсак, бировнинг хотинини талоқ қилдириб, демасдан, ўз синглисини, дейилмоқда. Ўша аёл ким бўлишидан қатъи назар, мазкура ёмон ниятли аёл учун Ислом бўйича сингил бўлади. Бу сингиллик эса, насаб йўли бўйичалик сингилдан кўра яқинроқ бўлади. Чунки, ўртада иймон ва Ислом ҳурмати бор. Ҳар бир мўмина-муслима аёл ушбу ҳақиқатни англаб етмоғи керак. Худди шунингдек, “Мафҳумул мухолафа” қоидасига биноан, хотинни эридан айнитиб, ўзиники қилиб олган эркак киши ҳам гуноҳкор бўлади (Аллоҳ билувчидир).