Кулбам ёняпти

• 

Подробности

Бўлим: Ҳикоялар

Чиққан санаси: 11 Октябрь 2014

(Нашр қилинган санаси)

Бир куни уммонда сузиб бораётган кема ҳалокатга учраб, чўкиб кетди.
Кемада йўловчилардан биргина киши тирик қолди.

Тўлқинлар ҳолдан тойган кишини одам оёғи етмаган бир оролга чиқариб қўйди...

У киши аввалги кунларда Аллоҳга “Мени қутқар” дея ёлвора бошлади.
Балки ёрдам келиб қолар дегандай уфққа боқди. Лекин, бирон-бир кема кўринмасди...

Орадан анча вақт ўтгач, шамолдан, ёмғирдан ва ёввойи ҳайвонлардан сақланиш мақсадида дарахт шохлари-ю баргларидан бир кулба қуриб олди. Кемадан соҳилга келиб қолган емиш, асбоблар ва шунга ўхшаш у-бу нарсаларни ҳам ўша кулбага қўйди. Кунлар ўта бошлади. Ҳар куни деярли бирдай...
Балиқ овлаб, шуни тановул қиларди... Уфққа боқарди... Қутқаришини сўраб Оллоҳга дуо қиларди...

Бир куни суви тугаб, ичишга сув топиш илинжида кулбасидан чиқди. Анчагина юриб, ортга қайтганида:
“Кулбаси ёнаётган эди!”

Шунчалик қаттиқ ёнаётганидан, осмонга қуюқ ва қалин тутун кўтарилаётганди...

Ушбу ҳодиса у учун жудаям оғир мусибат эди. Жудаям жаҳли чиқиб, ғазаби кучая бошлади:
“Аллоҳим! Бу не кўргулик? Менга шундай балони ҳам раво кўрдингми?”, - деб фарёд кўтарди...

Ўша оқшомни жуда ғазаб билан, кайфиятсиз ўтказди.
“Шунча дуолар қилсам ҳам, Аллоҳ менга шундай мусибатни раво кўрди-я?!” - деб,
тақдиридан куйина бошлади.

Эртаси саҳарлаб оролга яқинлашаётган бир кеманинг овозидан уйғониб кетди. Ҳа, уни қутқариш учун келишаётганди!

“Мени бу ерда эканимни қаердан билдинглар?” - деб сўради ҳалиги киши кемадагилардан.
Жавоб эса... уни – ҳам ҳайрон қолдирди, ҳам уялтирди:

“Тутун орқали берган ишоратингни кўрдик!”

eng_ojiz_banda таржимаси