Манийни ташқарига тўкиш мумкин

• 

Подробности

Бўлим: Никоҳ одоби

Чиққан санаси: 23 Июнь 2013

(Нашр қилинган санаси)

Мусулмон киши аёли билан қўшилганда (ҳомиланинг олдини олиш мақсадида) манийни ташқарига тўкиши жоиз. Бу тўғрида бир қанча ҳадислар мавжуд:

Биринчи: Жобир (р.а) ривоят қилади:
 «Биз (ҳатто) Қуръон нозил бўлаётган даврда (ҳам) манийни ташқарига тўкардик»[1]. Ҳадиснинг ровийларидан Суфён айтади: «Агар қайтариладиган иш бўлганида Қуръон албатта бизни қайтарган бўларди».
Бошқа бир ривоятда: «Биз Расулуллоҳ (с.а.в) даврларида ҳам манийни ташқарига тўкар эдик. Бунинг хабари Набий (с.а.в)га етган эса-да, бизни қайтармаганлар».[2]
Иккинчи: Абу Саъид Ал-Худрий (р.а) ривоят қилади:
«Бир киши: «Ё Расулуллоҳ, менинг бир чўрим бор. Унинг ҳомиладор бўлишини ҳоҳламайман, у билан қўшилганимда манийни ташқарига тўкаман ва мен эркаклар хоҳлаган нарсани хоҳлайман. Аммо яҳудийлар: «Бу иш болани тириклай кўмишдек гап»,- деб даъво қилишяпти»,- деди. Расулуллоҳ (с.а.в): «Яҳудийлар бекор айтибди. Агар Аллоҳ бола яратишни хоҳласа, сен бунга тўсқинлик қилишга қодир эмассан»,- дедилар».[3]
Учинчи: Жобир (р.а) бир кишининг Расулуллоҳ (с.а.в)нинг олдиларига келиб шундай дегани тўғрисида ривоят қилади:
«Менда хизматимизни қиладиган ва хурмоларимизни суғорадиган бир чўри бор. Баъзан мен унга бораман (яъни у билан жинсий алоқада бўламан), аммо у мендан хомиладор бўлишини хоҳламайман». Расулуллоҳ (с.а.в): «Агар хоҳласанг манийингни ташқарига тўк, аммо барибир унга тақдир қилинган нарса бўлади»,- дедилар. Бироз муддатдан сўнг ўша одам яна Расулуллоҳ (с.а.в)нинг олдиларига келиб: «У ҳомиладор бўлиб қолди»,- деди. Расулуллоҳ (с.а.в) унга: «Мен сенга: «Унга тақдир қилинган нарса барибир келади»,- деган эдим-ку?!»,- дедилар.[4]

[1] Бухорий ва Муслим ривояти.
[2] Муслим, Насоий ва Термизий ривояти.
[3] Насоий «ал-Ишра» номли асарида, Абу Довуд ва бошқалар ривояти, саҳиҳ.
[4] Муслим, Абу Довуд ва бошқалар ривояти.