Нафл рўзанинг қазосини тутиб қўйиш талаб қилинмайди

• 

Подробности

Бўлим: Никоҳ одоби

Чиққан санаси: 25 Июнь 2013

(Нашр қилинган санаси)

Агар киши нафл рўзасини очишга қарор қилса, ўша куннинг рўзасини қайта тутишга мажбур эмас. Бу тўғрида икки ҳадис мавжуд:
Биринчи: Абу Саъид ал-Худрий (р.а) ривоят қилади:
 «Мен Расулуллоҳ (с.а.в) учун таом тайёрладим. Набий (с.а.в) асҳоблари билан бирга келдилар. Таом олиб келинганида асҳоблардан бири: «Мен рўзадорман»,- деди. Расулуллоҳ (с.а.в): «Биродаринг сени таклиф қилди ва сен учун таом тайёрлади»,- дедилар. Кейин: «Рўзангни очгин ва хоҳласанг бошқа бир кун ўрнига тутиб қўярсан»,- дедилар».[1]
Иккинчи: Абу Жуҳайфа (р.а) ривоят қилади:
 «Расулуллоҳ (с.а.в) Салмон (р.а) билан Абу Дардо (р.а)ни ака-ука қилиб (тутинтириб) қўйдилар. Салмон (р.а) бир куни Абу Дардони кўргани келганида Умму Дардо (р.а)ни эскирган кийимда (яъни, ташқи кўринишига беэътибор) кўрди. Салмон (р.а) сабабини сўради. Умму Дардо (р.а): «Биродаринг Абу Дардонинг дунёдан бирор нарсага ҳожати йўқ»,- деди. Кейин Абу Дардо (р.а) келиб биродари билан кўришди ва уни таомга таклиф қилди. Салмон (р.а) унга: «Сен ҳам е»,- деди. Аммо Абу Дардо: «Мен рўза тутганман»,- деди. Салмон (р.а): «Сен емагунингча мен ҳам емайман»,-деди. Кейин Абу Дардо ҳам таом еди. Салмон (р.а) шу ерда тунаб қолди. Абу Дардо кечаси намозга турганида Салмон (р.а) уни тўхтатди ва: «Ухла»,- деди. Кейин яна турмоқчи бўлганида яна: «Ухла»,- деди. Кечанинг охирги қисми бўлгач: «Энди тур»,- деди ва бирга намоз ўқидилар. Сўнг Салмон унга: «Эй Абу Дардо, сенда Роббингнинг ҳаққи бор, сенда ўз танангнинг (нафсингнинг) ҳаққи бор ва сенда аёлингнинг ҳам ҳаққи бор. Барча ҳақдорга ўз ҳаққини адо қил»,- деди. Абу Дардо (р.а) Расулуллоҳ (с.а.в) ҳузурларига бориб, бу ҳақда айтганида Расулуллоҳ (с.а.в): «Салмон тўғри айтибди»,- дедилар)».[2]

[1] Байҳақий ва Табароний ривоят, ҳасан.
[2] Бухорий, Термизий ва Байҳақий ривояти.