Спорт ва ҳижоб уйғунлигини исботлаган 8 нафар спортчи хотин-қизлар

• 

Подробности

Бўлим: Спорт

Чиққан санаси: 17 Январь 2024

(Нашр қилинган санаси)

Мусулмон спортчи хотин-қизлар ҳар хил тўсиқларни муваффақиятли енгиб ўтиб, ҳар хил спорт турларида муваффақият қозонишди, ғарбнинг ҳижоб, шунингдек, мусулмон маданияти ва дини ҳақидаги стереотипларини йўққа чиқаришди. Кўплаб ҳижобли спортчилар турли мусобақаларда қатнашиб, ёш муслима аёлларга ўрнак бўлиб, уларга ҳижоб ўз мақсадларига эришишда тўсқинлик қилмаслигини кўрсатмоқда. Келинг, спорт ва ҳижоб бир-бирига мос келишини исботлаган саккиз нафар машҳур ва ёш спортчилар билан танишамиз.

 

1. Ибтиҳож Муҳаммад, қиличбозлик. 2014 йилда АҚШ дан келган ёш қиличбоз жаҳон чемпиони бўлди. 2016 йилда эса у ҳижобда Олимпиадада қатнашган биринчи америкалик мусулмон аёлга айланди. Ибтиҳож индивидуал турнирнинг иккинчи босқичига йўл олди. Бундан ташқари, у Олимпиада медалини қўлга киритган биринчи америкалик мусулмон аёл бўлишга муваффақ бўлди: у шамшир бўйича жамоавий мусобақада бронза медалини қўлга киритди.

2. Амайя Зафар, боксчи. АҚШ лик Амайя Зафар эндигина 16 ёшда, бироқ у боксга меҳр қўйган ва ҳижобдан воз кечмай, бокс билан профессионал тарзда шуғулланиш ҳуқуқини ҳимоя қилган. Спортчининг бокс бўйича илк жанги 2017 йилнинг 29 апрелида бўлиб ўтган. MPRNews нашрига берган интервьюсида у боксни ва исломни севишини ва ҳеч қандай шароитда ҳижобдан воз кеча олмаслигини айтди. Спортчи терма жамоа сафига қўшилиб, 2020 йилда Токиода бўлиб ўтадиган Олимпиадада қатнашмоқчи, бироқ бунинг учун Амайя Зафар рингга ҳижобда чиқиш учун Халқаро ҳаваскор бокс ассоциациясидан (AIBA) рухсат олиши керак бўлади.

3. Стефани Курлоу, балет. Австралиялик Стефани Курлоу болалигиданоқ балерина бўлишни орзу қилган. 2010 йилда исломни қабул қилганида Курлоу балетдан воз кечишга мажбур бўлди, чунки у ўз тамойилларига мос келадиган ва ҳижоб кийишга рухсат берувчи рақс мактабини топа олмади. Аммо 2017 йил январь ойининг охирида у ўзининг мутлақо ҳаммани қабул қиладиган балет мактабини очиш учун маблағ тўплашни бошлади. Жаҳон спорт кийимлари бренди Björn Борг 14 ёшли Стефани учун унинг ғайриоддий ҳикоясидан илҳомланган ҳолда мукофот эълон қилди. Стефани ўз интервьюсида шундай деди: "Мен ҳижоб кийган биринчи балерина бўлиш орқали дунёни бирлаштириб, инсониятни келишмовчиликлардан халос қилмоқчиман. Шу тариқа мен кўп одамларни ўзларига ишонишга ва орзуларига эришишга илҳомлантира оламан".

4. Заро Лари, фигурали учиш. Лари Бирлашган Араб Амирликларидан фигурали учувчи. 2011 йилда у халқаро мусобақада қатнашган биринчи Форс кўрфази спортчиси бўлди. 2017 йилда Nike бошқа мусулмон спортчилар иштирок этган Nike Pro Hijab кампаниясига "Муз маликаси"ни киритди. Лари ҳижобдаги биринчи профессионал фигурали учувчи бўлиб, ҳаммани ҳайратда қолдирди.

5. Амна ал-Ҳаддод, оғир атлетика бўйича БААлик Амна ал-Ҳаддод спорт фаолиятини кроссфитдан бошлаган, бироқ кейинчалик профессионал оғир атлетика билан шуғулланишга қарор қилган. 2012 йилда у CrossFit Asia мусобақасида ҳижобда қатнашган биринчи аёл бўлди. 2015 йилда эса у ҳижобдаги биринчи оғир атлетикачи бўлди ва IWF Осиё чемпионатида 6 та олтин ва 3 та кумуш медални қўлга киритди. Ушбу спортнинг қаттиққўллиги уни қўрқитмайди. Суҳбат чоғида у шундай таъкидлади: "Оғир атлетиканинг қийинчиликлари жисмоний заифлик билан эмас, балки ўзига қарши курашда кўпроқ ҳаракат қилишни талаб қилади ва бу менинг шахс сифатида ўсишим ва ривожланишимнинг асосий сабабларидан бири бўлди. Шунинг учун мен оғирлик кўтараман".

6. Раҳаф Хатиб, югуриш Бу спортчи Мичиган штатида яшайди, унинг уч фарзанди бор. У аллақачон 7 та марафонда қатнашган ва бу билан тўхтаб қолмоқчи эмас. Шунингдек, у "Women’s Running" журналининг муқовасида пайдо бўлган биринчи ҳижобли аёл бўлди. Хатибнинг айтишича, бу унинг учун жуда муҳим: «Мен [журнални] фарзандларимга, маҳалламга ва энг муҳими, ота-онамга кўрсата оламан. Менинг тўккан терларим, кўз ёшларим ва машғулотларим бунга арзийди».

7. Кубра Дағли, тхэквондо. Бу туркиялик 20 ёшли спортчи  октябрь ойи бошида Лима шаҳрида бўлиб ўтган тхэквондо WTF бўйича жаҳон чемпионатида пхумсэ бўйича олтин медални қўлга киритди. Бироқ у ҳижоби туфайли кўп танқидларга учради. Спортчи бир неча интервьюларида ҳар қандай камситишларга қарши эканлигини ва ҳижоб ўраш ва шу билан бирга тхэквондо билан профессионал тарзда шуғулланиш ҳуқуқини ҳимоя қилишини таъкидлаган. «Фақат бир нарса муҳим - спортдаги ютуқларим. Ахир улар менинг спортдаги муваффақиятларим ҳақида эмас, балки ташқи кўринишим ҳақида гапиришяпти. Менимча, биз ғалабаларимизни муҳокама қилишимиз керак, чунки биз уларга жуда кўп куч сарфлаймиз. Туркияни жаҳон чемпиони қилдик. Бу бизнинг катта фахримиз», - дейди муслима.

8. Хедая Ваҳба, тхэквондо. Мисрлик яна бир тхэквондочи Хедая Ваҳба 2016 йилги ёзги Олимпия ўйинларида бронза медалини қўлга киритиши билан машҳур бўлди. Хедая 2012 йилги Олимпия ўйинларида ҳам қатнашган. У тхэквондо билан 6 ёшида шуғуллана бошлаган, 14 ёшида Миср чемпиони бўлган, 23 ёшида эса 57 килограммгача бўлган вазн тоифасида бронза медалини қўлга киритган. Спортчи барча мусобақаларида ҳижобда қатнашади.

Абу Муслим тайёрлади