1. Skip to Menu
  2. Skip to Content
  3. Skip to Footer
  • Никоҳ эълони ва унда кўнгилху
  • Никоҳ тўйини қилиш кимнинг зи
  • Эр-хотин орасидаги муштарак ҳ

Muslima.Uz

Қоронғидан қўрқманг, тиниқиб ухлайсиз

 

 

 

Канадалик руҳшунослар қоронғиликдан қўрқиш уйқусизликнинг энг кенг тарқалган сабаби эканини аниқлашди.

Торонто университетида фаолият кўрсатувчи профессор Коллин Карни 100 нафар кўнгилли иштирокида тадқиқот ўтказди. Қатнашчилар икки гуруҳга бўлинди. Бирлари жуда яхши ухлашди. Қолганлари эса бу борада муаммолар юзага келаётганидан шикоят қилишди. Ҳар икки гуруҳ бир неча тунни лабораторияда ўтказишига тўғри келди. Бу ерда уларнинг миясини ҳордиқ чиқариш қобилияти ёритиш ва шовқин таъсирида ўрганилди.

Мисол учун, тажрибада иштирок этаётган одам ухлаётган хонада кутилмаганда мусиқа жаранглаб кетди. Баланд овоздаги қўшиқлар айрим ҳолларда хона ёруғ бўлганида, бошқа ҳолларда эса қоронғу хонада ёқилди. Натижада авваллари бедорлик борасида шикоят қилмаганлар атрофдан тўлалигича чалғиб, бамайлихотир ухлай олишди. Қолганлар эса тун бўйи чироқ ўчмай турганида ўзларини яхши ҳис қилишганини айтишди.

 

 

 

Кальций касал қиладими?

 

 

 

Аксарият ҳолларда кекса инсонларнинг суякларини мустаҳкамлаш учун тайинланадиган кальцийли озиқ қўшимчалари юрак хуружи юзага келиш эҳтимолини оширади. Германиялик олимлар шундай хулосага келишди.

Гейдельберг шаҳридаги саратонни тадқиқ этиш маркази мутахассислари 10 йил давомида 24 мингга яқин одамни кузатиб боришди. Кальцийли қўшимчаларни истеъмол қилмаган 15 минг одам орасида 851 ҳолатда инфаркт қайд этилди. Бундай воситалардан фойдаланувчи одамларда эса юрак хуружи юзага келиши 86 фоизга ортгани аниқланди.

Тадқиқотлар озиқ қўшимчаларини ишлаб чиқарувчиларнинг норозилигига сабаб бўлди.

Британия кардиология жамғармаси ходимлари эса таблетка кўринишидаги кальцийни қабул қилаётган одамларни улардан воз кечмасликка чақиришди. Ножўя ҳолатлар юзага келганида эса шифокор билан маслаҳатлашишни таъкидлаб ўтишди.

 

 

 

Теридан юрак ҳужайраси

 

 

 

Исроиллик олимлар теридан юракнинг соғлом ҳужайраларини яратишнинг уддасидан чиқишди.

Хайфа шаҳридаги тадқиқот маркази мутахассислари юрак хасталикларидан азият чекаётган икки кекса инсон терисидан намуна олишди. Кейинчалик улар тери ҳужайраларини ўзак ҳужайраларига айлантиришди ва шундан сўнг уларга бир-бири билан ўзаро таъсирга киришишни ўргатишди. Ҳосил қилинган материал микроскоп остида худди соғлом юрак ҳужайраларининг тўпламидек кўринишга келди.

Юрак ҳужайралари ёш ва соғлом алфозга кирганини қўшимча қилиш жоиз. Улар бемор туғилган кундаги ҳужайраларни эслатиб юборарди. Ваҳоланки, тери намуналарининг эгаси юрак етишмовчилигидан азия чекади ва унинг юрак ҳужайралари ачинарли аҳволга келган.

Ҳайвонларда ўтказилган синовлар киритилган ҳужайраларни организм яхши қабул қилганини кўрсатди. Бу эса ушбу усулнинг энг афзал жиҳатларидан биридир. Шунга қарамай унинг камчиликлари ҳам бор. Ҳосил қилинган ҳужайралар организмдан ташқарида кўп яшашмайди. Тадқиқотларга эса кўп вақт ва маблағни талаб этади.

 

 

 

Варикозни бир соатда даволаш мумкин!

 

 

 

Эндиликда вена қон томирларининг кенгайиши, яъни варикозни атиги бир соатда даволаш мумкин. АҚШлик флеболог Родни Рааб мураккаб жарроҳлик амалиётини ўтказмасдан, чандиқ ва узоқ вақт қайта тиклаш жараёнисиз ҳам беморларга оёқларини енгил ҳис этиш имконини берувчи усул учун патент олди.

Шифокорлар шикастланган томирга микронайча ёрдамида махсус елимсимон моддани киритишади. Шу туфайли қон соғлом веналарга фаоллик билан кириб боради. Варикоз билан зарарланган томирлар эса аста-секинлик билан қуриб, ташқаридан ҳам у қадар кўзга ташланмай қолади. Бу муолажада оғриқсизлантирувчи дори воситалари қўлланилмайди.

Айни пайтда 38 нафар кўнгилли ушбу муолажадан ўтишди. Уларнинг қарийб барчаси хасталикдан тузалишди. Юзага келган ягона ножўя таъсир эса терининг қизариши бўлди. Янги ва кенг миқёсли тажрибалар давомида бу усулнинг самарадорлиги ва хавфсизлиги тасдиқланса, уни барча шифохоналарда қўллаш мумкин бўлади.

 

 

 

Холецистит ҳақида

Холецестит ўт пуфагининг яллиғланиши бўлиб, нотўғри овқатланиш, сурункали қабзият, турли хил инфекцион хасталиклар туфайли келиб чиқади. Ўз вақтида даволанмаган холецистит сурункали турга ўтади ва кейинчалик ўт-тош касаллигига айланиб кетади.
Белгилар бошланса…
Беморнинг ўнг биқинда – қовурғаси остида тўсатдан қаттиқ оғриқ пайдо бўлади. Кўнгли айнаши, қусиши мумкин. Тана ҳарорати бироз кўтарилади. Баъзида оғриқ кучайиб, ўнг қўл ва ўнг куракка тарқалади. Кўп ҳолларда касалликнинг иккинчи ё учинчи куни тери ва кўз оқи сарғаяди. Сийдик қизғиш-сариқ ранга киради.
Ўткир холецистит аксарият вақтларда ёғли таомларни кўп егандан кейин бошланади. Бемор оғриқ бошланиши биланоқ уйга врач чақиради, у келгунча грелка қўйиши, меъдасини ювиши ёки сурги дорилар ичиши асло мумкин эмас. Ўткир холецистит билан оғриган беморлар касалхонада даволанишади.
Сурункали холецистит кўпинча ўткир холециститнинг бир неча бор хуружидан сўнг кузатилади. Бунда беморнинг ўнг қовурғаси остида ғижимловчи оғриқ туради. Айниқса, ёғли овқат истеъмол қилгандан сўнг оғриқ зўраяди. Қориннинг юқори қисмида оғирлик сезилади. Кўнгил айниб, кекирик пайдо бўлади. Сурункали холециститни шифохоналарда, санаторийларда даволаш яхши наф беради. Шифокор тавсия этган дори-дармонларни тўғри қабул қилиш лозим. Агар бемор даволанмасдан бепарво юраверса, унда ўт-тош касаллиги юзага  келади.
Ўт-тош касаллиги
Секин-аста ривожланадиган бу касалликда бемор ўнг қовурғаси остида бир неча йиллар давомида кучсиз оғриқни ҳис қилиб юради. Оғзи тахирлашиб, жиғилдони қайнайди. Баъзан ўнг қовурға остида санчиқ туриб, оғриқ қорин, ўнг кўкрак, ўнг елка, ўмровга тарқалади. Бу аломатлар ўт пуфагида тош пайдо бўлганини билдиради.
Қовурилган, мариновка қилинган ва дудланган маҳсулотларни истеъмол қилганда беморнинг кўнгли айнаши ва қорни соҳасида оғирлик сезиши мумкин. Қорин дам бўлиши ва қабзият ҳам ўт-тош касаллигига туртки беради. Чунки бундай ҳолларда ўт пуфагида ўт димланиши юз бериб, бора-бора ўт халтасида тош йиғилишига олиб келади. Ўт-тош касаллиги кучайганда фақат жарроҳлик усули қўлланади.
Нима қилмоқ керак?
1. Холециститга чалинган беморлар, айниқса, кечқурунлари аччиқ ва ёғли таомларни истеъмол қилишни чекланишлари керак.
2. Таомлар янги пиширилган бўлиши шарт, бемор ўта тўйиб овқатланмаслиги лозим.
3. Гўшт ва балиқнинг ёғли турлари, қўй ва мол ёғи, какао ичимлиги, шоколадлар, тухум сариғини ейишдан сақланинг.
4. Сутли таомлар ва творог, ёғсиз қатиқ, сузма, шунингдек ҳўл мева ва сабзавотлар тавсия этилади. Ичнинг равон келишига аҳамият беринг.
5. Семириш ва моддалар алмашинувининг бузилишига йўл қўймаслик керак. Камҳаракат бўлманг, эрталаблари енгил бадантарбия қилишга одатланинг.
6. Танадаги инфекция манбалари (касал тишлар, томоқ оғриғи, яъни, фарингит ва тонзиллит кабилар)ни ўз вақтида даволатинг.
7. Гўштни қайнатиб ё буғда пишириб истеъмол қилинг.
8. Овқатни ўсимлик ёғида тайёрлаш лозим. Оз-оздан тез-тез овқатланган маъқул.
9. Спиртли ичимликлар ичиш ва чекиш ҳам касалликни баттар оғирлаштиради. Бадҳазм овқатлардан сўнг ишқорли минерал сувлар ичишингиз мумкин.
10. Агар оила аъзоларингизнинг бирортасида (бобо ё буви, ота-она ва яқин қариндошларда) холецистит ёки ўт-тош касаллиги бор бўлса, сизда ҳам шунга мойиллик кузатилади, демак, касалликни бартараф этиш мақсадида юқоридаги барча маслаҳатларга амал қилишингиз шарт.
Халқ табобатидан
- Холециститни даволашда маккажўхори попуги ёрдам беради. Ундан қайнатма тайёрлаш усули: 2-4 қошиғи бир ярим стакан қайноқ сувда ярим соат милдиратиб қайнатилади. Кейин докада сузилади. Уч-тўрт соатда бир марта икки ош қошиқдан ичилади.
- Ўт пуфагида тош йиғилганда кашнич ва унинг илдизини қайнатиб ичиш лозим. Ушбу қайнатма ўт ҳайдайди, ўт пуфагидаги тошни туширишгаям ёрдам беради.
- Ибн Сино эрмон ўсимлигининг ер устки қисмидан тайёрланган дамламани ўт пуфаги касалликларида ичишни буюрган. Дамламани тайёрлаш учун икки стакан қайнаб турган сувни бир чой қошиқ майдаланган эрмон устига қуйиш ва оғзи ёпиқ идишда дамланади. Сўнг докада сузиб олинади. Кунига уч маҳал овқатдан ярим соат олдин чорак стакандан ичилади.
- Ўт пуфаги хасталанган бор беморлар наъматак, ёнғоқ, лимон, апельсин, карам, картошка, помидор, шивит ва кашнични мумкин қадар кўпроқ истеъмол этсалар, фойдаси бор.

Ҳозир сайтимизда 232 та меҳмон бор, сайт аъзолари эса йўқ